دورة تعليم صناعة الاكسسوارات (2)

من طرف eman-25 الخميس أغسطس 07, 2008 2:46 pm

السلام عليكم ورحمه الله وبركاته

اهلا بيكم يا اخواني واخواتي الكرا م ان شاء الله النهارده هاكمل معاكم الجزء الثاني من طريقة عمل الاكسسوارات خطوة خطوة

احنا كنا اتكلمنا المرة اللي فاتت عن الادوات وطريقة عمل عقد بسيط بالخيط الشفاف وكمان اتعرفنا على الزرد والمسامير وعرفنا اشكالهم

النهارده ان شاء الله هانتعلم نعمل حلق بسيط باستخدام المسمار والزرد

وده تقريبا نفس شكل الحلق اللي هانعمله النهارده

اولا : -
احنا عرفنا خلاص الادوات بتاعتنا المرة اللي فاتت وهاتفضل معانا ونشوف هانستعملها ازاي وكل حاجه هانستعملها في ايه بالظبط

هانعمل حلق يشبة الصورة ولكن ثلاث خرزات بس مش اربعه هانحتاج اربع خرزات ازرق واتنين لولي بني وشوية مسامير وشوية زرد واتنين عليقة الحلق ( بالنسبة لعليقة الحلق بتتباع جاهزة عند نفس المحلات السابق ذكرها ودي سعرها الدستة بتلاته جنية وبرضو فيه منها الدهبي والفضي والاوكسيدية)

ودي صوره الخامات اللي هانشتغل بيها

أولا هانجيب الخرز الازرق واللولي وندخل فيهم المسمار بالشكل ده

ثانية بالزرادية المدببه شوية دي هانتني المسمار بزاوية قايمة بالشكل ده

وبعدين طبعا احنا المفروض بلف الجزء ده بحيث انه يعمل حلقة زي اللي موجوده اساسا في المسمار بس ده بيتوقف على شكل وحجم الخرزة اللي احنا حطينها ياعني هنا الباقي من المسمار ده طويل على انه يتلف ويتعمل حلقه فاحنا بنقوم بقص الزيادة بالقصافه بحيث اننا نسيب مسافه حوالي نص عقله الاصبع كده بالشكل ده

بعدين بنلف الجزء الفاضل من المسمار بواسطه الزرادية ذات الرأس المدور بالشكل ده

وده فيديو بطريقة لف الجزء التاني من المسمار بالتفصيل للي مقدرش يوضحها بالظبط من الصور

https://www.youtube.com/watch?v=R6Hvs39RpsY&NR=1

وده هايبقى شكلها بعد ما لفينا الجزء التاني من المسمار

وطبعا بنكرر نفس الطريقة مع باقي الخرز واللولي اللي عندنا بالشكل ده

كده مش فاضل غير اننا نشبك الحاجات دي في بعضها بواسطة الزرد

اولا هانجيب زردة ونفتحها وهانستخدم الزرادية العاديه والتانية المدببة واحده بنمسك بيها والتانية بنفتح بيها بالشكل ده بنمسك الزردة بالبنسة المدببة ونفتحها بالتانية العادية

ودي بعد ما تتفتح هاتبقى بالشكل ده واحب اقول ملحوظة هنا اننا مش بنفتح الزردة بالعرض لاء بنفتحها لقدام ولورا ياعني مش بنشد واحنا ماسكين على اليمين والشمال لاء بنزقها رأسي مش افقي بالشكل ده بحيث ان شكل الزردة ميتغيرش ياعني نفتحها ونقفلها وتفضل على شكلها المتساوي والصورة هاتوضح النقطه دي ركزو في شكل الزرده وهيا مفتوحة هاتعرفو انا قصدي ايه

بعد كده بنجيب العليقة بتاعت الحلق وندخلها في الزردة بالشكل ده

وبعدين نفتح الزردة تاني وندخل فيها خرزة زرقاء بالشكل ده

وبنفس الطريقة ندخل زردة في الخرزة الزرقا وبعدها واحده لولي بني بالشكل ده

وكمان نكمل ونحط خرزة زرقا بعد اللولي البني بالشكل ده

وكده بنكون خلصنا الفردة الاولى من الحلق وبنفس الطريقة هانعمل الفردة التانية وحسب ذوقنا عايزين الحلق طويل قصير ممكن نعمله واحده لولي بس ممكن نعمله كله لولي كله خرز واللي في الصورة معمول اربعه مش تلاته طبعا الاذواق دي تبعكم بقى ابدعو فيها براحتكم وده الشكل النهائي اللي بيكون عليه الحلق

بالنسبة للكروت دي يا جماعه دي اختراعي انا بدل من الليبل او التكت لاني كنت محتاره اشبك الحاجات في اية ودي برضو هاتلاقوها هناك في نفس المكان عند الناس اللي بتبيع حاجات المكتبات واكياس الهدايا والحاجات دي وسعرها حوالي 18 جنية للباكت كلها وبيكون فيها تقريبا 100 كارت
-----------------------------------------------------------------------
وبكده نكون عرفنا ازاي نستعمل المسامير والزرد وعرفنا ازاي نعمل حلق وبنفس الطريقة ممكن نعمل عقد بدل ما نركب عليقة الحلق نكمل تشبيك الخرز في بعضه بواسطة الزرد لحد الطول المناسب لينا ونعمل عقد بنفس الطريقة مفيهاش اي تغيير وبالخيط الشفاف المطاط ممكن نعمله غويشة كمان ونكون عملنا طقم جميل بايدينا
========================================================
وبكده اكون انتهيت من الجزء التاني وان شاء الله معادنا المرة الجاية مع عقد شيك واتمنى ان يكون درس النهارده عجبكم ويكون سهل وبسيط ويارب الصور تكون واضحة برضو وفي الاخر هاسيبلكم مفاجأه صغيرة

طريقة عمل حلق شكل تاني بأبسط مايكون حتى الادوات بدائية جدا مستخدمين فيها القصافه العادية بتاعت الاظافر واتمنى يحوز على اعجابكم

https://www.youtube.com/watch?v=PdZfvkPgL4U&feature=related

---------------------------------------------------------------------
ربي إني لما أنزلت إلي من خير فقير

من طرف FatmaAlzhra الخميس أغسطس 07, 2008 3:17 pm

ما شاء الله لا قوة الا بالله
شغلك رائع اختى ايمان الله يجازيكى كل خير
ويبارك فيكى يارب
افدتينا جدا

من طرف eman-25 الخميس أغسطس 07, 2008 10:31 pm

FatmaAlzhra كتب:
ما شاء الله لا قوة الا بالله
شغلك رائع اختى ايمان الله يجازيكى كل خير
ويبارك فيكى يارب
افدتينا جدا

اختي فاطمة الزهراء اشكرك على الدعاء حبيبتي والحمد لله الحمد لله اني قدرت اوصل حاجه واي سؤال انا تحت امرك Smile

من طرف eman-25 الخميس أغسطس 07, 2008 10:35 pm

ودي صورة العقد بتاع الحلق معمول بنفس الطريقة

دورة تعليم صناعة الاكسسوارات (2) N721635856_976372_815

من طرف أمة الله الجمعة أغسطس 08, 2008 5:28 am

جزاكى الله خيراً و أكرمكى كثيراً على هذا المجهود
و ننتظر الدروس القادمة

وعليكم السلام ورحمة الله وبركاته
ما شاء الله عليكي
الشرح جميل جدا وبسيط وواضح مفيهوش اي مشكلة
انا كنت خايف ليحصل تعقيد لكن الحمد لله قريت الموضوع بتروي وطلع كويس وبسيط
منتظرين الدروس القادمة وياريت حضرتك تتواصلي مع الاخوات اللي من القاهرة ويحصل شغل ما بينكم
احنا عندنا عدد كويس من القاهرة لكن للاسف مش متجمعين ياريت حضرتك تاخدي المباردة وتجمعيهم وتعملي شغل معاهم واكيد اكيد بعون الله هيكون في شغل مميز لان ما شاء الله شغلك متقن جدا وواضح ان حضرتك متفرغة للموضوع ده
جزاكي الله خيرا

شوفوا ده لقيته لما دخلت الرابط اللي حطتيه ولفيت شوية ولقيته
https://www.youtube.com/watch?v=Pidd9dWw3mg&feature=related

من طرف eman-25 الجمعة أغسطس 08, 2008 12:06 pm

أحمد الأبنوبي كتب:

وعليكم السلام ورحمة الله وبركاته
ما شاء الله عليكي
الشرح جميل جدا وبسيط وواضح مفيهوش اي مشكلة
انا كنت خايف ليحصل تعقيد لكن الحمد لله قريت الموضوع بتروي وطلع كويس وبسيط
منتظرين الدروس القادمة وياريت حضرتك تتواصلي مع الاخوات اللي من القاهرة ويحصل شغل ما بينكم
احنا عندنا عدد كويس من القاهرة لكن للاسف مش متجمعين ياريت حضرتك تاخدي المباردة وتجمعيهم وتعملي شغل معاهم واكيد اكيد بعون الله هيكون في شغل مميز لان ما شاء الله شغلك متقن جدا وواضح ان حضرتك متفرغة للموضوع ده
جزاكي الله خيرا

شوفوا ده لقيته لما دخلت الرابط اللي حطتيه ولفيت شوية ولقيته
https://www.youtube.com/watch?v=Pidd9dWw3mg&feature=related

الله يخليك يا استاذ احمد الحمد لله ان الشرح واضح كنت خايفه يكون مش حلو وحاولت على قد ما اقدر اني اعمل صور كتير وادور على فيديو يوضح الجزء اللي مش باين كويس والحمد لله ان الدرس عجبكم وبالنسبة للاخوات اللي من القاهرة ياريت انا اتمنى من زمان ان الكل يجتمع ويعمل حاجه اكيد هانستفيد ونقدر نساعد بعض ومين عارف يمكن نكبر ان شاء الله ونكون شركة مصرية لصناعة الاكسسوارات ونصدر كمان اشمعنى الصين هيا احسن مننا انا حاضيفهم كلهم ان شاء الله وهانتكلم وربنا يوفقنا للي فيه الخير
وانا شغلي عادي والله فيه ناس كتير برضو زيي ويمكن اكتر وانا فعلا متفرغه للموضوع ده بس الاهم اني بحبه جدااا وده اللي بيطلع الحاجات حلوة كده مهم جدا الواحد يحب الحاجه اللي بيعملها عشان كده بتطلع مميزة

الفيديو جميل فعلا يا استاذ احمد جزاك الله خير وفيه على اليوتيوب فيديوهات كتيييييير وانا شخصيا اتعلمت منها كتير اوي بس انا بنزل حاجات واحده واحده عشان محدش يتلخبط Smile

جميل...علي فكرة انتي ليه مش باينة علي الماسنجر انا ممكن اديكي ايميلات لاخوات تانيين ممكن تعملي شغل معاهم لما تكوني داخلة إن شاء الله هديلك الايميلات

بالنسبة للفيديوهات دي...فعلا جميلة جدا بس لو سمحتي هوا في فيديوهات زيها في صناعة الشمع وهل في لصناعات تانية وزراعات؟ انا بحثت عن candle وللأسف موصلتش لحاجة لو حضرتك عندك ياريت تفيدينا جزاكي الله خيرا

إن شاء الله ربنا ييسر وهيكون في شركة إن شاء الله بس ناخد المبادرة ونشتغل شغل صح زي شغل حضرتك واكيد اكيد لما ربنا يشوفنا بالجدية دي اكيد هيعينا ويوفقنا وينصرنا وإن شاء الله تكون الشركة دي هي الاكبر والاحسن في العالم كله..ليه لأ احنا مش اقل من الاجانب والصينيين في حاجة..شوفتوا افتتاح الاولمبياد النهارده اد ايه حاجة رائعة جدا

من طرف eman-25 الجمعة أغسطس 08, 2008 12:26 pm

أحمد الأبنوبي كتب:

جميل...علي فكرة انتي ليه مش باينة علي الماسنجر انا ممكن اديكي ايميلات لاخوات تانيين ممكن تعملي شغل معاهم لما تكوني داخلة إن شاء الله هديلك الايميلات

بالنسبة للفيديوهات دي...فعلا جميلة جدا بس لو سمحتي هوا في فيديوهات زيها في صناعة الشمع وهل في لصناعات تانية وزراعات؟ انا بحثت عن candle وللأسف موصلتش لحاجة لو حضرتك عندك ياريت تفيدينا جزاكي الله خيرا

إن شاء الله ربنا ييسر وهيكون في شركة إن شاء الله بس ناخد المبادرة ونشتغل شغل صح زي شغل حضرتك واكيد اكيد لما ربنا يشوفنا بالجدية دي اكيد هيعينا ويوفقنا وينصرنا وإن شاء الله تكون الشركة دي هي الاكبر والاحسن في العالم كله..ليه لأ احنا مش اقل من الاجانب والصينيين في حاجة..شوفتوا افتتاح الاولمبياد النهارده اد ايه حاجة رائعة جدا

كنت لسه هاقولك اني مش لاقيه ايميلات حد من القاهرة هنا غير واحده بس ياريت فعلا نتواصل مع بعض وبالنسبة للفيديوهات انا عملت بحث على candle making ولاقيت الرابط ده اتمنى يكون مفيد بما اني مش بفهم في الشموع كويس بس اعتقد ان فيه حاجات حلوة

https://www.youtube.com/results?search_query=candle+making&search_type=&aq=0&oq=candle+m

والصين دي عاملالي عقده نفسيه بجد نفسي اعمل ولو حاجه واحده بس واغرق بيها السوق بحيث اننا منبقاش محتاجين نستوردها ابدا ده احنا حتى بنستورد زينة رمضان من هناك تخيلو Evil or Very Mad

ده احنا اللي مخترعينها يا ناس شوية ورق وبنعملهم مثلثات ونعلقهم نبقى ندفع فيهم فلوس اااد كدا ونستوردهم يلا اقول ايه ربنا يقدرنا يارب وزي ما قولت فعلا على قد مجهودنا واصرارنا ربنا حايدينا وحايفتحلنا الابواب ان شاء الله

جزاكي الله خيرا
شوفت 2 منهم الحمد لله فيه حاجات كويسة هكمل الباقي بعدين إن شاء الله

منتظرين منك ما هوا اجمل وانتظروا مني شغل مميز إن شاء الله بعد دورة الشمع اللي هناخدها إن شاء الله
جزاكم الله خيرا

من طرف eman-25 الجمعة أغسطس 08, 2008 4:42 pm

بالتوفييق يا احمد يارب ويارب دايما في تقدم مستمر ان شاء الله

من طرف نرمين السبت أغسطس 09, 2008 3:36 am

ربنا يكرمك يا ايمان ما شاء الله عليكى
والله موضوع الصين دا معقدنا كلنا والله كل حاااااااااااااجه دلوقتى صينى صينى الواحد مش عارف يروح منهم فين , نفسى اشترى حاجه القيها صنع فى مصر

من طرف alectra1987 السبت أغسطس 09, 2008 8:17 am

السلام عليكم يا ايمان
انا اسمى ايمان من الشيخ زايد وعاوزة اشكرك على كورس الاكسسوارات لانى بجد استفدت منه كتير وشرحك سهل ومبسط واى حد ممكن يفهمه فجزاكى الله خير

من طرف ياسمين السبت أغسطس 09, 2008 3:20 pm

السلام عليكم ماشاء الله بجد الطريقة واضحة وجميلة جزاك الله خيرا و منتظرين الجديد

من طرف eman-25 السبت أغسطس 09, 2008 6:01 pm

نرمين كتب:

ربنا يكرمك يا ايمان ما شاء الله عليكى
والله موضوع الصين دا معقدنا كلنا والله كل حاااااااااااااجه دلوقتى صينى صينى الواحد مش عارف يروح منهم فين , نفسى اشترى حاجه القيها صنع فى مصر

ان شاء الله انا وراهم والزمن طوييييييل وطالما نيتنا خير هانوصل ان شاء الله هما مش احسن مننا في حاجه بالعكس احنا احسن وممكن نعمل حاجات احسن من بتاعتهم ميت مرة احنا بس نتكاتف ونتعاون ونتقن شغلنا ونتوكل على الله ربنا يكرمنا كلنا ويقدرنا ويثبتنا يارب

من طرف eman-25 السبت أغسطس 09, 2008 6:06 pm

alectra1987 كتب:السلام عليكم يا ايمان
انا اسمى ايمان من الشيخ زايد وعاوزة اشكرك على كورس الاكسسوارات لانى بجد استفدت منه كتير وشرحك سهل ومبسط واى حد ممكن يفهمه فجزاكى الله خير

ربنا يخليكي يا ايمان والحمد لله والشكر لله انه عجبك جزانا واياكي يارب خير ان شاء الله

من طرف hindawy1973 الإثنين سبتمبر 29, 2008 6:58 pm

الشرح اكتر من رائع يا ايمان وسهل والحلق والعقد روعة وسهلين اوي
والفيديوهات يا احمد سهلة وجميلة
وانا ال عاوزة كورس انا من الاسكندرية حد هنا ممكن يديني كورس؟
وعموما انا منتظرة باقي الشرح يا ايمان انا ف الدورة بتعتك الحمد لله فاهمة ويمكن محتاجش كورس بس عاوزة باقي الدروس يا ايمان وانا ان شاء الله ف انتظارك
هند

السلام عليكم
اهلا بكي اختي هند
هكلم الاخت ايمان لما اشوفها في اقرب وقت إن شاء الله عشان ترجع بدوراتها
احنا علي فكرة هنعمل منتدي جديد غير ده
ياريت حضرتك تضيفي ايميلي عشان لو حبيتي تساعدينا في المنتدي ده واوصلك بالاعضاء في محافظتك إن شاء الله
imc1426@yahoo

من طرف eman-25 الأربعاء أكتوبر 01, 2008 6:36 pm

hindawy1973 كتب:الشرح اكتر من رائع يا ايمان وسهل والحلق والعقد روعة وسهلين اوي
والفيديوهات يا احمد سهلة وجميلة
وانا ال عاوزة كورس انا من الاسكندرية حد هنا ممكن يديني كورس؟
وعموما انا منتظرة باقي الشرح يا ايمان انا ف الدورة بتعتك الحمد لله فاهمة ويمكن محتاجش كورس بس عاوزة باقي الدروس يا ايمان وانا ان شاء الله ف انتظارك
هند

سلام عليكم ميرسي اوي على كلامك الجميل والحمد لله ان الدورة عجبتك والشرح كان سهل انا للاسف غبت فتره عنكم معلش بس ان شاء الله هاكمل معاكم باذن الله وده ايميلي ضيفني وانا تحت امرك في اي سؤال

bosycataccessories@yahoo.com

وعليكم السلام ورحمة الله وبركاته اختي ايمان عايز اكلمك لو شفتيني اونلاين كلميني عشان انتوا دايما بتدخلوا اوفلاين..يلا متنسيش ومنتظرين باقي الدورة Smile

من طرف جيهان الجمعة فبراير 05, 2010 5:45 am

اختى العزيزه ايمان انا عاوزه ابتدى فى المشروع ده و خائفه ممكن اعرف مكان يعرفنى اكثر اتدرب فيه.. لو تعرفى اماكن تدريب ياريت تقول لى .. انا ساكنه فى مدينة نصر
وشكرا على افادتك لينا
جزاك الله خيرا

من طرف moharasha الإثنين فبراير 15, 2010 5:05 am

الاخت ايمان جزاكى الله خيرا على هذة المعلومات الجميلة والمبسطة ارجو معرفة كيفية التواصل معكم انا اسمى رشا ولدى منفذ للبيع للسياح واحلم بعمل اكسسوارات مميزة جدا لهم ويكتب عليها صنع فى مصر بايدى مصرية رقم هاتفى هو 0106405743

من طرف moharasha الإثنين فبراير 15, 2010 5:20 am

والله ربنا يكرمك يا أخت إيمان انا مش مصدقة السهولة والدقة التى عرضت بها هذا الموضوع وانا عمالة اقرأالتعليقات واشعر برغبة فى البكاء جزاكم الله خيرا

جزاكي الله كل خير يا إيمان أنا عضوة جديدة في المنتدى بشكرك جداً على الأعمال الحلوة دي وعلى فكرة أنا بشتغل إكسسوارات والحمد لله كل اللي يشوفها تعجبه قوي بس المشكلة عندي في التسويق فيا ترى إيه حل المشكلة دي وعلى فكرة أنا من إسكندرية، أرجو رداً مفيداً في هذا الموضوع.

من طرف مني كرم الجمعة مارس 11, 2011 1:31 pm

جميل اوي الموضوع ده يا ايمان بجد حاجه جميله انك تقدر تصنع حاجه بايدك وانا عايزه اتعلم الموضوع ده بتمكن وكمان عايزه اعرف لو انا عملت ده مين ممكن يشتري مني الاشياء اللي هعملها لو طلعت حلوه وجيده وياريت تكملي معانا وترسلي صور كتير لاشكال كتيره

دورة تعليم صناعة الاكسسوارات (2)

دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)

رد: دورة تعليم صناعة الاكسسوارات (2)